أول سؤال بيجي في دماغك بعد ماتقول الجمله دي، هو لو حصل فيه مشكله لا قدر الله هيكون ايه الحل؟ وهل فعلا مشاكله كتير؟ دا اللي هنتكلم عنه في البوست دا.

في البدايه سيفون الدفن عباره عن قاعده تواليت جزء منها بيركب في مرحله تأسيس السباكة وده اسمه الخزان او التانك والجزء التاني بيركب مع التشطيب ودي القاعده الصيني.

– الخزان المدفون زي ما قولنا بيركب في مرحله التأسيس، ودا عباره عن شاسيه حديد من الصلب المعالج وبيحتوي علي خزان بلاستيك لتخزين المياه، وده بيحتاج لعرض طوبه ٢٥ سم عشان يتوظف صح وبعد كده بيتمحر وبنركب عليه السيراميك بتاعنا أو الرخام.

طيب لو الحيطه اللي هدفن فيها الخزان نص طوبه ١٢.٥ سم مش طوبه ٢٥ سم، مش هينفع أدفن الخزان فيها، لان السمك بتاع الخزان تقريبا ١٣ سم، طيب بعمل ايه في الحاله دي؟ بركب خزان الدفن بتاعي عادي علي الحيطه، وبعد كدا ببني جلسه من الطوب.

– الجزء التاني ودي القاعده الصيني وفي منها نوعين :
نوع ستاند وثابت علي ارضيه الحمام، والنوع التاني معلق وغير ملامس للأرض، طب النوع المعلق ده مش ممكن يكون ضعيف ويتكسر ؟ بص ياسيدي القاعده المعلقه بتتحمل حتي وزن 450kg ودي مش كلامي ده كلام الشركات المصنعه.

– طب ليه بنلجأ لتركيب القاعده الدفن ؟
١- بتضيف للحمام لمسة الرقي والجمال بعيداً عن الشكل التقليدي للقاعدة العادية، كمان بتسمحلك تعمل تشكيلات ديكورية خصوصا مع استخدام الاضاءه الغير المباشره لو تم توظيفها صح.
٢- لو الحمام بتاعك صغير بندفن الخزان في الحيطه والقاعده الصيني بتعملها معلقة، فكل الكلام دا بيدي اتساع للحمام بتاعك.

– بس يا بشمهندس بيقولوا ان اعطاله كتير ومش هنعرف نعمله صيانه عشان هو مدفون!!
نفسي اعرف بس مين اللي بيقولوا دول ? بص يا سيدي هو لو اعطاله كتير زي ما بيقولوا مكنش كل الفنادق والمولات الضخمه بتركبه علي الرغم من كثافه الاستخدام البشري فيها علي عكس الاستخدام المنزلي.

– بس ده سعره غالي جدا ؟
هيا فعلا اغلي نسبيا من القاعده العاديه ولكن الفرق مش ضخم مقارنه بالمميزات بتاعتها، وبوجه عام احنا مينفغش نسترخص في بند السباكة ولازم نتعامل مع شركات معروفه وليها اسمها في المجال.

– افضل شركات ممكن تجيب منها خزانات الدفن (جروهي – جبرت)، ولو حصل اي عملية صيانه بتتم من خلال الشركة المصنعة وكل الصيانات بتكون داخل الضمان اللي بيوصل أحيانا لمدي الحياة.

في النهايه مهم جدا اللي بيركب خزان الدفن يكون حد متخصص ويكون عنده الخبره الكافيه في تركيبها عشان تتجنب اي خساير او مشاكل مستقبليه.

واخيرا في cover بلاستيك بيجي مع خزان الدفن وده لازم تركبه علي فتحه التانك في مرحله التأسيس عشان تتجنب دخول اي رواسب او بواقي اسمنتيه داخل التانك اثناء مرحله تركيب السيراميك او اي أعمال بوجه عام.

Leave a comment