عايزة ديكور بسيط وأنيق ويدي لشقتك احساس بمساحة أوسع خدي الكام نصيحة دول

  • الاضاءة جزء أساسي من ديكور البيت وعامل رئيسي في الاحساس بمساحة الشقة لأنه كل ما يكون الضوء أفتح وأكتر، كل ما هتحسي براحة أكتر و هتحسي ان شكل بيتك أوسع.
  • الألوان الفاتحة من أكتر الحاجات اللي بتخلق بهجة وسعادة في البيت ودة لأنها بتساعد في دخول الضوء للبيت وبتخلي شكله أوسع. فيفضل انك تختاري الألوان الفاتحة للحيطان والعفش زي: اللون الأبيض والبيج واللون الأصفر والفستقي الفاتح والسيمون…الخ.
  • “المطبخ الأمريكي” من أكتر الحاجات اللي عليها طلب الفترة دي لأن شكله بيكون بسيط وأنيق وكمان بيديكي الوسع اللي انتي عايزاه لأنه بيكون مفتوح على الصالة.
  • خليكي عملية في اختيارك للعفش..يعني مثلا ممكن تستخدمي الترابيزة اللي بتفتح وتقفل بدل السفرة لأنها بتكون خفيفة ومش هتاخد مساحة كبيرة من شقتك وممكن تنقليها لمكان تاني في حالة لو جالك ضيوف علشان مساحة بيتك تكون أكبر.
  • قللي من استخدام الكنب في غرفة المعيشة لأنه بياخد مساحة كبيرة واستفيدي من المساحة الباقية بانك تحطي كراسي عادية.
  • الكنبة اللي بتتحول لسرير بتكون مهمة جدا في حالات الضيافة لأنها بتشيل عدد كبير
    من الناس وبكدة استخدامك للكراسي اللي ممكن تزحملك الشقة هيكون أقل.
  • الرفوف المثبتة على الحيطة بتكون مفيدة جدا في اوض النوم الصغيرة لأنها بتغنيكي عن الدولاب اللي بياخد مساحة كبيرة من الأوضة؛ الرفوف ممكن تحطي عليها كل كتبك واكسسواراتك وممكن كمان تعلقي عليها الهدوم، وبكده هيبقى شكل اوضتك أنيق ومنظم ومساحته أكبر.

Leave a comment